पोखरामा देखिए बेपत्ता सिन्धुलीका हायू परिवार, घटनाले रहस्य बढायो

सिन्धुली/पोखरा, साउन १२
केही दिनदेखि बेपत्ता रहेका सिन्धुलीको गोलन्जोर गाउँपालिका–६ का हायू परिवारका सदस्यहरू पोखरामा देखिएका छन्। उनीहरू गत शनिबार (साउन ५ गते) पोखराको न्युरोडस्थित होटल जननीमा पुगेको खुलेको छ।

होटलका सञ्चालक सुनिल भूर्तेलका अनुसार, ती परिवारका सदस्यहरू शनिबार होटलमा आएको र आइतबार नै चेकआउट गरेको जानकारी दिएका छन्।
“तीनवटा कोठा लिएर बसेका थिए, १५–१६ जना जस्तै थिए,” भूर्तेलले भने, “शान्त र सामान्य व्यवहार देखिएका थिए, तर सबैजना एकैसाथ आएको देखेर मैले ध्यान दिएको थिएँ।”

उनीहरूले होटल छाडेपछि सञ्चालक भूर्तेलले स्वयं प्रहरीलाई खबर गरेका थिए। “परिवार बेपत्ता भएको खबर थाहा पाएपछि मैले तुरुन्तै जानकारी गराएँ,” उनले बताए।

के हो पृष्ठभूमि?

यसअघि सिन्धुली प्रहरीले १६ जना परिवारका सदस्य बेपत्ता भएको जानकारी दिएको थियो। उनीहरूमध्ये काठमाडौंमा बस्दै आएकी सुझाता हायूसँग सम्पर्क भएको उल्लेख गरिएको थियो। तर, उनीहरूले स्वेच्छाले पोखरा गएका हुन् वा अन्य कुनै कारण रहेको भन्नेबारे हाल अनुसन्धान जारी रहेको प्रहरी स्रोतले जनाएको छ।

अनुसन्धान तीव्र

हाल पोखरास्थित सीसीटीभी फुटेज, होटलको रेकर्ड, र यात्रा विवरणहरू संकलन गरी थप खोजी भइरहेको प्रहरीले जनाएको छ। परिवार किन सम्पर्कविहीन भए, किन चुपचाप पोखरा पुगे, उनीहरू अहिले कहाँ छन् भन्ने यकिन विवरण भने अझै आउन बाँकी छ।

स्थानीयबासी र आफन्तको अपिल

स्थानीयबासी र आफन्तहरू परिवारका सदस्य सकुशल फिर्ता होउन् भन्ने आशामा पर्खाइमा छन्। हायू परिवारको यो सामूहिक बेपत्ता घटना झनझन रहस्यमय बन्दै गएको छ।

प्रशासन पनि सक्रिय

सिन्धुलीका प्रमुख जिल्ला अधिकारी दिनेश सागर भुसालले उक्त परिवार पोखरामा पुगेको सूचना प्राप्त भएको र पुष्टि गर्न सुरक्षा निकायहरू खटिएका बताएका छन्।

हाल घटनाबारे थप अनुसन्धान जारी छ।